كلمة وطن


يعنى إيه .. كلمة وطن ؟
يعنى بيت وصوت ودم
يعنى فكر ونور وهم
يعنى إبنى أما بشوفه
يجرى ليا
ألحق وأضمه
فى حضنى ضم
يعنى إيه كلمة وطن ؟
يعنى صوت مسموع فى قلبى
وكلمة تايهة من حروفها
وفعل مكسوف من كسوفها
وجملة تنهى بيها خوفها
ولما تتعب من صراخها
تيجى ضمة تضمه ضم
يعنى إيه كلمة وطن ؟
يعنى ميه ولون وطعم
ومادة تالتة
لما تتفاعل حروفها
ييجى إسم مبتدأ
يجيب خبر من جار عليه
وأما فعل الهم يبدأ
يبقى ع البادى السلام
يبقى مفعول
م البداية للختام
يعنى إيه كلمة وطن؟
يعنى خوف
ما أعرف طريقه
ومد شوف
مالهوش نهاية
ونور بيعرف فين طريقه
وأما يتعرض له حد
تبقى رجل واحدة دابة
تدب فوق الأرض دبة
تبقى زلزال ع إللى كان
تبقى زلزال ع إللى خان
ويعنى إيه ....
يعنى تتمحى من بين حروفه
أى معنى لخوف .. وموت .. وهم
أو أى معنى للوهن
ويعنى إيه كلمة وطن ؟؟؟